സ്വര്‍ണ വിലയ്‌ക്കൊപ്പം വായ്പയിലും വന്‍ കുതിപ്പ്; ഒറ്റവര്‍ഷം 50% വര്‍ധന

സ്വര്‍ണവില ദിനംപ്രതി ഉയരുന്നതിനിടെ ഇന്ത്യയില്‍ സ്വര്‍ണ വായ്പക്ക് വന്‍തോതില്‍ ആവശ്യകത ഉയര്‍ന്നതായി റിപ്പോര്‍ട്ട്. 2025-26 സാമ്പത്തിക വര്‍ഷത്തില്‍ ഗോള്‍ഡ് ലോണ്‍ വിതരണം 50 ശതമാനം വരെ വര്‍ധിച്ചതായാണ് ധനകാര്യ മേഖലയിലെ കണക്കുകള്‍ വ്യക്തമാക്കുന്നത്. അടിയന്തരമായി പണം കണ്ടെത്താനുള്ള എളുപ്പവഴിയായി കൂടുതല്‍ ഇന്ത്യക്കാര്‍ സ്വര്‍ണത്തെ ആശ്രയിക്കുകയാണെന്ന് ഇന്ത്യ ടുഡേയുടെ റിപ്പോര്‍ട്ടില്‍ പറയുന്നു.

ബാങ്കുകളിലും നോണ്‍-ബാങ്കിങ് ഫിനാന്‍സ് കമ്പനികളിലും ഗോള്‍ഡ് ലോണ്‍ അപേക്ഷകള്‍ കുത്തനെ ഉയര്‍ന്നിട്ടുണ്ട്. പ്രത്യേകിച്ച് മുത്തൂറ്റ് ഫിനാന്‍സ്, മണപ്പുറം ഫിനാന്‍സ് പോലുള്ള സ്വര്‍ണവായ്പ കമ്പനികള്‍ക്ക് വലിയ വളര്‍ച്ചയാണ് ലഭിച്ചിരിക്കുന്നത്. മുത്തൂറ്റ് ഫിനാന്‍സ് അടുത്തിടെ പുറത്തുവിട്ട കണക്കുകള്‍ പ്രകാരം, കമ്പനിയുടെ ഗോള്‍ഡ് ലോണ്‍ ആസ്തികളില്‍ 50 ശതമാനം വാര്‍ഷിക വളര്‍ച്ച രേഖപ്പെടുത്തി.

സ്വര്‍ണവില കുത്തനെ ഉയര്‍ന്നതും വായ്പാവിതരണം വര്‍ധിക്കാന്‍ കാരണമായി. സ്വര്‍ണത്തിന്റെ വിപണി മൂല്യം ഉയരുമ്പോള്‍ അതേ അളവിലുള്ള സ്വര്‍ണം പണയംവെച്ച് കൂടുതല്‍ തുക വായ്പയായി ലഭിക്കുകയാണ്. അതിനാല്‍ വ്യക്തിഗത വായ്പകളേക്കാള്‍ കുറഞ്ഞ സമയത്തിനുള്ളില്‍, കുറഞ്ഞ ഡോക്യുമെന്റേഷനോടെ പണം ലഭിക്കുന്ന ഗോള്‍ഡ് ലോണിലേക്കാണ് ആളുകള്‍ കൂടുതല്‍ തിരിയുന്നത്.

കുടുംബ ചെലവുകള്‍, ചെറിയ ബിസിനസ് ആവശ്യങ്ങള്‍, വിദ്യാഭ്യാസം, ആശുപത്രി ചെലവുകള്‍, കടബാധ്യത തീര്‍പ്പാക്കല്‍ തുടങ്ങിയ ആവശ്യങ്ങള്‍ക്കായി ആളുകള്‍ ഗോള്‍ഡ് ലോണ്‍ എടുക്കുന്നു. ഗ്രാമീണ മേഖലകളിലും ചെറുകിട വ്യാപാരികളിലും ഗോള്‍ഡ് ലോണ്‍ ഒരു പ്രധാന സാമ്പത്തിക ആശ്രയമായി മാറിയിരിക്കുകയാണ്.

റിസര്‍വ് ബാങ്ക് ഓഫ് ഇന്ത്യ വ്യക്തിഗത വായ്പകള്‍ക്കും ക്രെഡിറ്റ് കാര്‍ഡുകള്‍ക്കും മേല്‍ നിയന്ത്രണം കടുപ്പിച്ചതും ഗോള്‍ഡ് ലോണിലേക്കുള്ള മാറ്റത്തിന് കാരണമായതായി വിദഗ്ധര്‍ വിലയിരുത്തുന്നു. സുരക്ഷിത വായ്പയായതിനാല്‍ ബാങ്കുകള്‍ക്കും എന്‍ബിഎഫ്‌സികള്‍ക്കും ഗോള്‍ഡ് ലോണ്‍ നല്‍കുന്നത് കൂടുതല്‍ സുരക്ഷിതമാണെന്നാണ് കണക്കാക്കുന്നത്.

ഇന്ത്യയില്‍ കുടുംബങ്ങള്‍ കൈവശം വയ്ക്കുന്ന സ്വര്‍ണത്തിന്റെ അളവ് ലോകത്തില്‍ തന്നെ ഏറ്റവും കൂടുതലാണെന്നാണ് വിവിധ പഠനങ്ങള്‍ പറയുന്നത്. എന്നാല്‍ അതില്‍ ചെറിയ വിഹിതം മാത്രമാണ് ഔദ്യോഗിക ധനകാര്യ സംവിധാനത്തിലൂടെ വായ്പയ്ക്കായി ഉപയോഗിക്കപ്പെടുന്നത്. നിലവിലെ സാമ്പത്തിക സമ്മര്‍ദ്ദങ്ങളും ഉയര്‍ന്ന സ്വര്‍ണവിലയും കൂടുതല്‍ കുടുംബങ്ങളെ സ്വര്‍ണ പണയത്തിലേക്ക് നയിക്കുന്നതായി റിപ്പോര്‍ട്ടുകള്‍ സൂചിപ്പിക്കുന്നു.

അതേസമയം, ഗോള്‍ഡ് ലോണ്‍ അതിവേഗത്തില്‍ ഉയരുന്നത് ഭാവിയില്‍ അപകടസാധ്യതകള്‍ക്കും വഴിവയ്ക്കാമെന്ന ആശങ്ക ഉയരുന്നുണ്ട്. സ്വര്‍ണവിലയില്‍ വലിയ ഇടിവുണ്ടായാല്‍ വായ്പാ മൂല്യത്തിലും തിരിച്ചടവിലും സമ്മര്‍ദ്ദമുണ്ടാകാമെന്നാണ് റേറ്റിംഗ് ഏജന്‍സികളുടെ മുന്നറിയിപ്പ്. അതിനാല്‍ തന്നെ റിസര്‍വ് ബാങ്ക് പുതിയ മാര്‍ഗനിര്‍ദേശങ്ങള്‍ കൊണ്ടുവന്ന് ഗോള്‍ഡ് ലോണ്‍ മേഖലയെ കൂടുതല്‍ നിയന്ത്രണ വിധേയമാക്കാന്‍ ശ്രമിക്കുന്നുണ്ട്.

Content Highlights: When money gets tight, many Indians are increasingly turning to something already sitting safely at home, i.e., gold jewellery. Whether it is for medical needs, business expenses, education or simply quick access to cash, borrowing against gold is becoming a popular choice.